強迫金賺錢第一步 合併戶口要知道

香港很多人也嫌麻煩，MPF戶口唔理，轉工多次又唔去合併戶口。連自己辛苦賺返來的血汗錢都怕麻煩，不如的起心肝處理咗佢！


蘋果日報，六月十三日                        

http://hk.apple.nextmedia.com/financeestate/art/20140613/18756379

【本報訊】強積金之所以俾人叫強迫金，皆因唔少打工仔話啲供款年年蝕之餘，仲要交管理費。其實識得打理識得揀，唔止唔使蝕，回報分分鐘好過係股市炒出炒入。財經動學堂將一連四個星期五，由賬戶管理到揀選基金，全部教晒你。

今個星期就教大家整合戶口。轉過幾份工的打工仔，如果一直都無理過自己戶口的話，應該都有幾個保留賬戶，根據積金局的資料，有個打工仔高峰嗰陣，有32個賬戶，真係睇月結單都睇到頭暈啦。如果你有幾個賬戶，梗係整合做一個更有效率，除咗易打理，唔使年年俾受託人硬食，否則戶口好快被陰乾。唔知自己有幾多個戶口？

Click以下網址下載查詢表格﹕
http://www.mpfa.org.hk/tch/......uiries/files/Form_PA_SM.pdf

填好簡單資料，寄去積金局，大概兩個星期就會收到相關資料。

查到有幾個賬戶又要點做呢？首先睇睇當中有無計劃回報表現較好，有的話，

就將啲錢轉晒過去，整合為一個賬戶，要點做吖？

Click以下網址下載表格，一份表格就可以整合多個戶口﹕
http://www.mpfa.org.hk/tch/......files/Annex_C_to_IV_3_c.pdf

強積金半自由行推出年幾，不過仲有好多打工仔唔清楚「半自由行」係指邊個部份。措施下，打工仔係每個曆年，即1月1日至12月31日，有一次機會將現職強積金供款僱員部份轉至自己心儀的強積金受託人。舉例說，若打工仔係2014年11月30日將供款轉走，最快於2015年1月才可以再次申請。康宏強積金業務拓展董事鍾建強提醒，積金半自由行並非一勞永逸，若現職僱主選用的強積金受託人非心儀選擇，打工仔需要每年申請。他又表示「打工仔唔應該為半自由行而轉，若僱主選用的積金受託人表現好，唔使轉會更加理想」。

打工仔揀咗心水受託人，要點轉會呢？

Click以下網址，下載資金轉移申請表﹕
http://www.mpfa.org.hk/tch/......files/Annex_A_to_IV_3_c.pdf

填妥後郵寄或親身交予心儀強積金受託人，若兩三個星期後，收到新受託人發出的「轉移確認書」，即轉移完成。如果遲遲未收到的話，可能表格資料或簽名有錯，要向新受託人查詢。

未揀定受託人，唔知點揀？今日就下載表格查清楚自己有幾多戶口先，未來幾個星期五，財經動學堂教大家點揀!